Dómstóll í Los Angeles komst að þeirri niðurstöðu á miðvikudag að fyrirsætan og fatahönnuðurinn Manuela Ósk Harðardóttir hefði brotið Haagsamninginn með því að flytja með börn sín tvö til Bandaríkjanna síðastliðið haust. 

Manuela fór af landi brott með börnin í lok september í fyrra en hún er með sameiginlega forsjá yfir börnunum með barnsfeðrum sínum. Annar þeirra er Grétar Rafn Steinsson, fyrrverandi atvinnumaður og landsliðsmaður í knattspyrnu. Í október kom í ljós að Manuela var farin úr landi án þess að hafa fengið til þess leyfi frá pöbbunum.

Síðan hefur málið verið á borði barnaverndar, innanríkisráðuneytisins og lögreglu, eða í tæpa átta mánuði. Fór svo að foreldrarnir, feðurnir tveir og Manuela voru boðuð að mæta fyrir dómstól í Los Angeles fyrr í vikunni. Flugu feðurnir utan til að vera viðstaddir dóminn.

Niðurstaða dómstólsins var sú að um ólögmætt brottnám væri að ræða og þar með brot á Haagsamningnum. Var feðrunum afhent vegabréf barnanna og héldu þeir til Íslands með börnin. Manuela og móðir hennar fóru með sama flugi og komu þau öll til landsins í gær.

Á vef innanríkisráðuneytisins er fjallað um brottnámsmál en þar segir að í slíkum málum sé ekki tekin afstaða til þess hvort foreldra sé betur hæft til að fara með forsjá barns og hvort þeirra skuli hafa forsjá barns til frambúðar.

Meginhugsunin að baki Haagsamningnum sé að koma að nýju á því ástandi sem var áður en brottnámið átti sér stað.

Manuela hefur verið afar virk á samfélagsmiðlum undanfarin misseri þar sem hún nýtur mikilla vinsælda. Hefur leyft þúsundum fylgjenda á Snapchat að fylgjast með lífi hennar og barnanna í Los Angeles þar sem hún stundar nám. Þá er hún með rúmlega 50 þúsund fylgjendur á Instagram.