Sigmundur segir leiðréttingu skattstjóra lækka skattbyrðina

Endurákvörðun Ríkis­skattstjóra (RSK) á opinberum gjöldum hjónanna Önnu Sigurlaugar Pálsdóttur og Sigmundar Davíðs Gunnlaugssonar felur í sér að þegar upp er staðið munu þau greiða minna en þau greiddu samkvæmt fyrri skattskilum. Þetta segir Sigmundur Davíð við Fréttablaðið.

„Það er enn óljóst hversu mikill heildarsparnaðurinn verður því hann kemur að miklu leyti til á næstu árum í formi skattafrádráttar,“ segir Sigmundur. Fréttablaðið fór fram á það að gögn yrðu lögð fram sem styddu fullyrðinguna að á heildina litið fælist hagræði í þessu. Ekki var unnt að verða við þeirri beiðni í gær.

„Það hefur vakið furðu mína hversu langt sumir hafa gengið í að afbaka staðreyndirnar sem birtust í dag. Menn virðast sumir hvorki botna upp né niður í því sem þeir eru að leysa og búa þá bara til sína eigin sögu,“ segir Sigmundur.

Í Fréttablaðinu í gær var sagt frá því að hjónin hefðu óskað eftir því í maí 2016 að RSK leiðrétti skattframtöl þeirra gjaldárin 2011 til og með 2015. Leiðréttingin varðaði félag í hennar eigu, Wintris, sem skráð er á Bresku Jómfrúaeyjum.

Í erindi hjónanna til RSK kemur fram að eignir Wintris hefðu verið taldar fram sem eignir Önnu og tekjur af félaginu taldar fram sem fjármagnstekjur hennar. Þessari tilhögun hafi hún ekki breytt eftir lögfestingu CFC-reglna, sem kveða meðal annars á um að greiða skuli tekjuskatt hér af hagnaði félags sem íslenskur skattaðili á en er í lágskattaríki eins og Wintris, árið 2009.

„Í því sambandi hefði verið horft til yfirlýsts tilgangs með reglunum, sem væri að sporna við skattundanskotum, en kærendur hefðu talið að framtalsmáti þeirra samrýmdist þessum tilgangi,“ sagði í erindinu. Þá var tekið fram að það hefði „hugsanlega verið réttara“ að haga skattskilum samkvæmt efni reglnanna.

Með erindinu fylgdu gögn sem varða Wintris. Ákvörðun RSK fól í sér að gjaldstofn vegna tekjuskatts og útsvars var hækkaður en gjaldstofn vegna fjármagnstekjuskatts var lækkaður. Auðlegðarskattur var endurákvarðaður en ekki kemur fram hvort það hafi verið til hækkunar eða lækkunar. Undu hjónin þeirri niðurstöðu.

Hluti ákvörðunarinnar var kærður til yfirskattanefndar. Sneri sá hluti málsins að færslu vegna gengisbreytinga á þeim grundvelli að ekki væri til að dreifa gengishagnaði eða gengisbreytingum af starfsemi Wintris. Yfirskattanefnd komst hins vegar að annarri niðurstöðu og féllst á kröfur Önnu og Sigmundar.

Í niðurstöðu nefndarinnar segir að skattlagning á grundvelli CFC-reglnanna gerði ráð fyrir því að tekjur hins íslenska skattaðila vegna eignarhalds á lágskattasvæði séu skattskyldar með sambærilegum hætti og um væri að ræða starfsemi hér á landi. Frá því væru þó sérstaklega tilgreindar undantekningar. Taka hefði þurft sérstaklega fram ef slíkt ætti ekki að gilda um færslu gengismunar.

Niðurstaðan fól meðal annars í sér að uppsafnað ónotað frádráttarbært tap þeirra varð 162 milljónir króna í stað 50 milljóna. Þá endurgreiddi skatturinn þeim 25 milljónir sem áður höfðu verið ofgreiddar.