Gunnhildur Yrsa leiddi lið sitt í bikarúrslit

Gunnhildur Yrsa Jónsdóttir lék allan leikinn og bar fyrirliðabandið þegar Valerenga tryggði sér farseðil í úrslitaleik norska bikarsins í dag.

Valerenga bar sigurorð af Lilleström sem verður að teljast nokkuð óvænt þar sem Lilleström er með yfirburðarstöðu á toppi norsku úrvalsdeildarinnar á meðan Valerenga situr í 8.sæti.

Hin bandaríska Stephanie Verdoia gerði eina mark leiksins á 17.mínútu en Lilleström hafði unnið sjö leiki í röð þegar kom að leiknum í dag.

Gunnhildur Yrsa er á sínu fyrsta tímabili hjá Valerenga eftir að hafa komið frá Stabæk. Avaldsnes og Arna-Bjornar mætast í hinni undanúrslitaviðureigninni í dag.