Lemar ánægður með að vera áfram hjá Monaco

Thomas Lemar er sagður mjög ánægður með að vera áfram hjá Monaco, en Lemar var mikið orðaður burt frá félaginu í gær. Bæði Arsenal og Liverpool báru víurnar í kappann.

Lemar skoraði tvisvar í 4-0 sigri Frakka á Hollendingum í gær, en fyrra mark kappans var stórglæsilegt á Stade De France. Hann var sagður frekar vilja ganga í raðir Liverpool en Arsenal.

Monaco samþykkti 92 milljóna punda tilboð í Lemar, en á endanum féll samnningurinn upp fyrir. Sögusagnir segja að Lemar hafi ekki viljað ganga í raðir Arsenal, en af því ganga tvennar sögur.

„Ég er leikmaður Monaco, ég er mjög ánægður þar. Núna ætla ég að eiga gott tímabil með mínu félagi, til þess að halda áfram að þróast og komast lengra sem knattspyrnumaður."

Arsenal vonuðust til þess að Lemar myndi koma í stað Alexis Sanches sem virtist vera á leið til Man. City í gær, en sá samningur gekk ekki heldur upp svo Sanches verður áfram hjá Arsenal og Lemar hjá Monaco.