Tugir látnir í miklum flóðum í Kína

33 manns hið minnsta eru látnir og fimmtán er saknað eftir mikil flóð í héruðunum Hunan, Hubei, Anhui, Sichuan og Guizhou. Hundruð þúsunda hafa neyðst til að flýja heimili sín vegna gríðarlegs úrhellis síðustu daga og hættu á frekari flóðum.

Vatnyfirborð í rúmlega sextíu fljótum hefur farið yfir skilgreind hættumörk og hafa þúsundir hektara ræktarlands farið undir vatn.

Ástandið er einna verst í Hunan-héraði þaðan sem fréttir bárust um helgina um að fimm hafi farist í aurskriðum og fjögurra sé enn saknað. Rúmlega 300 þúsund manns hafa flúið heimili sín og á sjöunda þúsund heimila eyðilagst.

Í Guangxi hafa sextán manns hið minnsta farist og fjölmargra er saknað. Sex hundruð hús hafa eyðilagst og 90 þúsund manns hafa neyðst til að flýja heimili sín.