Leggja gjöld á eldisfisk

Framfaraflokkurinn í Noregi óttast að ný gjöld á eldislax sem norska stórþingið hefur samþykkt leiði til þess að ný störf skapist í Póllandi í stað Noregs. Sveitarfélög við sjávarsíðuna gætu fengið 400 milljónir norskra króna í aukatekjur á hverju ári samkvæmt nýrri samþykkt þingsins.

Árið 2013 voru bein og óbein störf við vinnslu norsks lax í Evrópu 100 þúsund. Roy Steffensen, þingmaður Framfaraflokksins, bendir á að greiða þurfi gjald af hverju kílói af óunnum fiski sem fluttur er út. Sveitarfélögin fái peninga í kassann þótt vinnslan fari fram erlendis.

Fulltrúi Sósíalíska vinstri flokksins, Torgeir Knag Fylkesnes, segir gjöldin mikilvægan sigur fyrir sveitarfélög við sjávarsíðuna. Fiskeldisfyrirtækin greiði nú engin gjöld fyrir afnot af hafsvæðunum.