Fyrrum stjóra Gylfa boðin stjórastaðan hjá Middlesbrough

Garry Monk verður væntanlega næsti knattspyrnustjóri Middlesbrough en stjórnarformaður félagsins hefur boðið honum starfið samkvæmt heimildum BBC.

Garry Monk var einn af nokkrum sem fóru í viðtal fyrir starfið en stjórnarformaðurinn Steve Gibson ákvað að Monk væri besti kosturinn í stöðunni.

Middlesbrough féll úr ensku úrvalsdeildinni í vor eftir að hafa gefið mikið eftir á lokakaflanum.

Gary Monk, sem er 38 ára gamall, hætti óvænt hjá Leeds 25. maí síðastliðinn eftir ósætti við eigandann Andrea Radrizzani. Leeds endaði í sjöunda sæti í ensku b-deildinni á síðasta tímabili.

Monk stýrði Gylfa Þór Sigurðssyni og félögum í Swansea í ensku úrvalsdeildinni frá 2014 til 2015 áður en hann var látinn fara frá félaginu. Monk lék líka á sínum tíma með Gylfa hjá Swansea.