Sam Allardyce vill ekki vera áfram með Crystal Palace

Sam Allardyce hefur tilkynnt eiganda Crystal Palace að hann vilji ekki halda áfram sem knattspyrnustjóri enska úrvalsdeildarliðsins.

Allardyce hitti Steve Parish, eiganda félagsins, í kvöld og samkvæmt heimildum Sky Sports var niðurstaðan af þeim fundi að Allardyce vilji ekki halda áfram í þessu starfi.

Það voru engin leiðindi á milli þeirra Allardyce og Parish samkvæmt frétt Sky Sports og málið snýst heldur ekki um peninga til að kaupa nýja leikmenn til liðsins í sumar.

Crystal Palace hefur ekki sagt frá starfslokum Allardyce og það er eins og menn þar á bæ vonist enn til að hann haldi áfram.  Það er þó ekki að fara gerast samkvæmt heimildum Sky Sports.

Sam Allardyce tók við liðinu af Alan Pardew í desember þegar Crystal Palace var í sautjánda sæti og aðeins stigi fyrir ofan fallsætið. Palace-liðið endaði í fjórtánda sæti og var að mestu laust við falldrauginn á lokasprettinum. Lið undir stjórn Allardyce hefur aldrei fallið og það breyttist ekki í ár.

Þetta var fyrsta starf Sam Allardyce eftir að hann hætti óvænt með enska landsliðið eftir aðeins  67 daga í starfi.

Undir stjórn Allardyce vann Palace meðal annars sex af átta leikjum og á þeim kafla vann liðið Chelsea, Arsenal og Liverpool.