Miðarnir sem Gylfi og félagar keyptu enduðu á svörtum markaði

Swansea City er að berjast fyrir lífi sínu í ensku úrvalsdeildinni og þarf á góðum stuðningi að halda á áhorfendapöllunum.

Gylfi Þór Sigurðsson og leikmenn Swansea-liðsins vildu koma til móts við stuðningsfólk liðsins og hjálpa því að komast til Sunderland á laugardaginn þar sem liðið spilar nánast leik upp á líf eða dauða í ensku úrvalsdeildinni.

Gylfi og félagar keyptu þannig 3000 miða á leikinn sem stuðningsmenn Swansea fengu gefins. Viðbrögðin voru mikil og miðarnir flugu út.

Félagið tilkynnti hinsvegar í gær að einhverjir af þessum miðumr hafi síðan farið aftur í sölu á vefsíðum sem selja miða. Á síðunum höfðu viðkomandi viljað fá allt að 60 pund fyrir miða sem hann hafði áður fengið frítt. 60 pund eru rúmlega átta þúsund íslenskar krónur. BBC segir frá.

Swansea gat út yfirlýsingu í gær þar sem félagið lýsti miklum vonbrigðum með þróun mála. Það er ekki vitað hversu margir miðar voru komnir í sölu á svörtum markaðu en þeir voru þó nokkrir samkvæmt upplýsingum frá Swansea.

Talsmaður Swansea var mjög leiður yfir því að sannir stuðningsmenn Swansea hafi ekki fengið tækifæri til að fá fríu miðana sem hafi í stað þess endað á svikahröppum sem ætluðu að græða á öllu saman.

Swansea vann 1-0 sigur á Everton um síðustu helgi og komst upp úr fallsæti því Hull tapaði fyrir Sunderland. Sunderland er fallið en getur haft mikil áhrif á fallbaráttuna eins og sást með sigri þess á Hull.