Ragnar ekki í hóp þegar Fulham tapaði í umspilinu

Ekkert verður af því að Ragnar Sigurðsson og félagar í Fulham leiki í ensku úrvalsdeildinni á næsta tímabili.

Fulham tapaði í kvöld fyrir Reading, 1-0, í seinni leik liðanna í umspili um sæti í ensku úrvalsdeildinni. Fyrri leiknum lyktaði með 1-1 jafntefli.

Ragnar var ekki í leikmannahópi Fulham, ekki frekar en í fyrri leiknum á laugardaginn.

Yann Kermorgant skoraði eina mark leiksins í kvöld úr vítaspyrnu á 49. mínútu.

Lærisveinar Jaaps Stam mæta annað hvort Huddersfield eða Sheffield Wednesday í úrslitaleiknum um sæti í ensku úrvalsdeildinni.

Huddersfield og Sheffield Wednesday mætast öðru sinni annað kvöld. Fyrri leikurinn endaði með markalausu jafntefli.