Bandaríkjamaður handtekinn í Norður-Kóreu

Norður-kóresk yfirvöld handtóku bandarískan borgara í landinu í gær, að sögn ríkisfréttastofu landsins. Maðurinn er sakaður um aðgerðir gegn stjórnvöldum í Pyongyang.

CNN hefur eftir ríkisfréttastofunni að maðurinn heiti Kim Hak-song. Séu fréttirnar réttar sé Kim fjórði bandaríski borgarinnar sem sé í haldi í Norður-Kóreu.

Breska ríkisútvarpið BBC segir að Kim hafi starfað í Vísinda- og tækniháskólanum í Pyongyang. Bandarísk stjórnvöld hafa áður sakað norður-kóresk stjórnvöld um að handtaka Bandaríkjamenn til að nota sem peð í valdatafli.

Mikil spenna hefur ríkt á milli bandarískra og norður-kóreskra stjórnvalda að undanförnu. Norður-Kóreumenn hafa gert eldflaugatilraunir og hótað að gera frekari kjarnorkutilraunir og á móti hefur tónn ríkisstjórnar Donalds Trump í garð landsins harðnað.

Norður-kóresk stjórnvöld sökuðu Suður-Kóreumenn og Bandaríkjamenn um að leggja á ráðin um að ráða Kim Jong-un af dögum á föstudag.