Stefna að stækkun bannsvæðis hópbifreiða í Reykjavík

Samgöngustjóri Reykjavíkur segir líklegt að tillaga sem felur í sér stækkun á bannsvæði hópbifreiða í Reykjavík taki gildi fyrir sumarið. Hann segir ummæli framkvæmdastjóra Kynnisferða þar sem borgin er sökuð um samráðsleysi vegna bannsins sé ef til vill byggð á misskilningi enda hafi bannið ekki tekið gildi.

Í hádegisfréttum Bylgjunnar í gær var rætt við framkvæmdastjóra Kynnisferða sem gagnrýndi borgaryfirvöld fyrir samráðsleysi vegna stækkunar á bannsvæði fyrir umferð hópbifreiðar í Reykjavík sem hann taldi hafa tekið gildi í vikunni.

Þorsteinn Hermannsson, samgöngustjóri Reykjavíkur, sagði í hádegisfréttum Bylgjunnar í dag að einungis sé um tillögu að ræða og ekkert bann hafi enn tekið gildi.

„Það virðist hafa orðið einhver misskilningur á að það sé búið að stækka bannsvæði fyrir hópbifreiðar í miðborginni, það hefur ekki verið gert. Í mars var hins vegar sett tillaga um stækkun á þessu bannsvæði á vef Reykjavíkurborgar en það hefur ekkert af þessu tekið gildi ennþá.”  

Aftur á móti er gert ráð fyrir að tillagan, sem felur í sér að bannsvæðið stækki, taki gildi fyrir sumarið.

„Þetta verður einhvern tímann á næstu vikum og við munum kynna það vel með góðum fyrirvara svo að hægt sé að aðlaga sig breyttum veruleika.”

Mikið um kvartanir

Gistirými í miðborginni eru fjölmörg og því fylgir tilheyrandi umferð hópbifreiða fyrir ferðamenn. Þorsteinn segir íbúa miðborgarinnar hafa kvartað lengi yfir mikilli umferð hópbifreiða og því sé mikilvægt að tillagan taki gildi.

„Það er gríðarlega mikið um kvartanir og núning á milli ferðaþjónustuaðila og almennrar umferðar og íbúa í miðborginni. Þetta hefur verið að valda miklum núning svo við viljum bara koma betri skipulagi á þetta,” sagði Þorsteinn að lokum.