Verði jafnlaunaferlið hunsað kostar það sekt

Frumvarp um jafnlaunavottun er tilbúið og hefur verið sent úr félagsmálaráðuneytinu til lokayfirlestrar í forsætisráðuneytinu. Þorsteinn Víglundsson félagsmálaráðherra mun að öllum líkindum mæla fyrir frumvarpinu í ríkisstjórn í þessari viku.

Samkvæmt frumvarpinu þurfa fyrirtæki eða opinberar stofnanir með 25 starfsmenn eða fleiri að undirgangast ferli til að hljóta jafnlaunavottun. Ef fyrirtæki getur sýnt fram á að ekki ríki kynjað launamisrétti innan fyrirtækisins hlýtur fyrirtækið vottun sem gildir í þrjú ár. Að þeim þremur árum liðnum þarf ferlið að hefjast að nýju.

Verði frumvarpið að lögum er gert ráð fyrir því að þau taki gildi um næstu áramót. Stærstu fyrirtækin þurfa þá strax á því ári að undirgangast ferlið en þau minnstu, innan rammans, undirgangast ferlið að þremur árum liðnum.

Öllum fyrirtækjum sem hafa þennan fjölda starfsmanna ber lagaleg skylda til að undirgangast ferlið. Ef það er trassað hefur Jafnréttisstofa það verkefni með höndum að áminna og ýta á skil á gögnum. Ef fyrirtæki hunsar þær áminningar kemur til þess að það verður rukkað um dagsektir.

Þorsteinn Víglundsson félagsmálaráðherra segir ánægjulegt að aðilar vinnumarkaðarins hafi náð saman um frumvarpið. „Eðli málsins samkvæmt fæddist upprunalega hugmyndin um jafnlaunastaðla hjá vinnumarkaðnum. Við gáfum aðilunum talsvert rúman tíma til að fara vel og vandlega yfir þetta og ná saman um málið. Það er ánægjulegt að það hafi tekist að skapa sæmilega breiða samstöðu.“

Frumvarpið fer til meðferðar hjá þinginu fljótlega. Þorsteinn leggur áherslu á að fjöldatakmörkum frumvarpsins verði ekki breytt. „Það er ekki mitt að segja þinginu fyrir verkum í þeim efnum en við leggjum áherslu á að með þessu erum við að ná til um 70 prósenta af íslenskum vinnumarkaði. Sá starfsmannafjöldi sem þarna miðast við er í samræmi við núgildandi lög um jafnréttisáætlanir.“

Ólafur Stephensen, framkvæmdastjóri Félags atvinnurekenda, segir ánægjulegt að í frumvarpinu felist ákveðin tröppun þannig að smærri fyrirtæki hafi lengri tíma til að aðlagast nýjum reglum. „Það sem við höfum bent á er að mörg fyrirtæki á stærðarbilinu frá 25 og upp í 100 starfsmenn eru jafnvel ekki með mannauðsstjóra. Það er mikið umstang og rask að ráðast í þetta og þessu fylgir mikil vinna.“

Hann segir þó að ánægja ríki með jafnlaunavottunina yfirhöfuð. „Flestum af okkar aðildarfyrirtækjum ber saman um að vottunin sé afskaplega gagnleg og á endanum borgi hún sig væntanlega. Þessi aðlögunartími er til bóta þó að maður hefði viljað sjá eitthvað fleira koma á móti.“ 

Fréttin birtist fyrst í Fréttablaðinu.