Bæjarstjórinn vill hefja viðræður við HB Granda strax á morgun

Sævar Freyr Þráinnsson, bæjarstjóri Akranesbæjar, segist vera þakklátur HB Granda eftir að félagið tók ákvörðun um að fresta uppsögnum í botnfiskvinnnslu félagsins og ganga til viðræðna við bæjarfélagið.

„Nú er tækifæri til að við getum sest niður til samninga. Vonandi strax á morgun,“ segir Sævar Freyr í samtali við Vísi. Akranesbær samþykkti viljayfirlýsingu í gær þar sem biðlað var til HB Granda um að fresta ákvörðun sinni. 93 störf voru í hættu um mánaðarmótin en HB Grandi gefur sé nú til 1. júní til þess að ljúka viðræðum við bæjarfélagið.

Bæjarstjórnin lagði fram fjórar tillögur að útfærslu á framkvæmdum við höfnina á Akranesi til að koma til móts við HB Granda. Á meðal þeirra er 40.000 fermetra landfylling þar sem hægt væri að koma fyrir lóðum fyrir starfsemi félagsins.

Sjá einnig: Vilhjálmur segir frestun uppsagna vera varnarsigur

Sævar bendir þó á að Faxaflóahafnir þurfi einnig að koma að viðræðunum en treystir því að þar á bæ verði vel tekið í tillögur bæjarins.

„Eins og ég hef sagt þá þarf þrjá til,“ segir Sævar Freyr. „Þriðji aðilinn er Faxaflóahafnir og ég er sannfærður um að þeir muni ekki liggja á liði sínu til þess að koma þessu í heila höfn.“

Líkt og áður segir gefur HB Grandi sér til 1. júní til að ljúka viðræðum. Fáist ekki jákvæð niðurstaða mun félagið loka botnfiskvinnslunni á Akranesi þann 1. september.

Sævar Freyr segir að bæjarbúar geri sér grein fyrir því að mikil vinna sé fyrir höndum og ekkert sé fast í hendi, nú sé þó von um að það fáist farsæl niðurstaða í málið.

„Það er von og við ætlum að leggja allt í það að breyta þeirri von í árangur.“