Mexíkanski eiturlyfjabaróninn Joaquin Guzman, sem oftast er nefndur „El Chapo“ (Sá stutti) hefur lagt fram kvörtun til dómstóla yfir meðferð bandarískra fangelsismálayfirvalda á sér. BBC greinir frá. 

Guzman er haldið í fangelsi undir hámarks öryggisgæslu í New York, en hann er talinn hafa stjórnað einum stærstu samtökum í heimi sem sérhæfa sig í fíkniefnasmygli. Hann lýsti yfir sakleysi sínu fyrir dómi í síðasta mánuði.
Sjá einnig: El Chapo lýsir yfir sakleysi sínu

Hann hefur tvisvar sloppið úr fangelsi í Mexíkó, áður en hann var framseldur til Bandaríkjanna, í fyrra skiptið nýtti hann sér þvottakörfu, en í seinna skiptið slapp hann í gegnum jarðgöng úr klefa sínum.

Að sögn lögfræðinga Guzman hefur honum verið neitað um að fá að hitta eiginkonu sína og verið haldið að mestu leyti í einangrun, eða 23 tíma á sólarhring.

Lögfræðingar hans hafa biðlað til yfirvalda um að sýna El Chapo meiri manngæsku, en þeim hefur á móti verið bent á óvenjulega sögu sakborningsins, sem eins og hefur komið fram, hefur sloppið úr tveimur fangelsum.