Landsliðsmaður Panama myrtur fyrir utan heimili sitt

Amílcar Henríquez, landsliðsmaður Panama, var skotinn til bana í gær.

Samkvæmt yfirvöldum í Panama var Henríquez skotinn nokkrum sinnum er hann yfirgaf heimili sitt í Colón, heimaborg sinni.

Henríquez var fluttur á sjúkrahús í nágrenninu þar sem hann lést af sárum sínum. Hann var 33 ára. Ekki liggur fyrir hver eða hverjir stóðu fyrir árásinni á Henríquez.

Henríquez, sem var varnarsinnaður miðjumaður, lék 75 landsleiki fyrir Panama á árunum 2004-17.

Henríquez var á mála hjá Árabe Unido í heimalandinu, liðinu sem hann hóf ferilinn með. Hann spilaði einnig nokkur ár í Kólumbíu.