Hollendingar samþykkja loks viðskiptasamning ESB og Úkraínu

Öldungadeild hollenska þingið samþykkti í dag viðskiptasamning Evrópusambandsins og Úkraínu. Þetta þýðir að öll aðildarríki ESB hafa nú gefið grænt ljós á samninginn.

Jean-Claude Juncker, forseti framkvæmdastjórnar ESB, segir samninginn færa Úkraínu nær Evrópu. „Atkvæðagreiðsla dagsins sendir skýr skilaboð frá Hollandi og Evrópusambandinu öllu til vina okkar í Úkraínu: Úkraína á heima í Evrópu. Framtíð Úkraínu er í Evrópu,“ segir Juncker.

Skrifað var undir samninginn árið 2014 en á vordögum 2016 höfnuðu Hollendingar samningnum í þjóðaratkvæðagreiðslu. Allt frá þeim degi hefur verið unnið að því að ná lausn í málinu og fá samninginn fullgildan án þess að þurfa að endurtaka staðfestingarferlið í öllum aðildarríkjunum.

Leiðtogar aðildarríkja ESB hafa lagt áherslu á að samningurinn þýði ekki að Úkraína fái stöðu umsóknarríkis. Sömuleiðis felur samningurinn ekki í sér að ESB-ríkin skuldbindi sig til að verja Úkraínu.

Öll aðildarríki höfðu samþykkt samninginn á sínum tíma en hollenskur hópur ESB-andstæðinga tókst að safna nægilegum fjölda undirskrifta til að knýja fram þjóðaratkvæðagreiðslu um málið. Þar beið hollenska ríkisstjórnin lægri hlut, þó að atkvæðagreiðslan hafi ekki verið bindandi.