Crystal Palace ætlar að lokka stjóra Jóhanns Berg til sín

Crystal Palace ætlar að reyna að lokka Sean Dyche, knattspyrnustjóra Burnley, á Selhurst Park. The Guardian greinir frá.

Palace er í stjóraleit eftir að Sam Allardyce hætti óvænt fyrr í vikunni. Stóri Sam tók við liðinu um síðustu jól og hélt því í ensku úrvalsdeildinni.

Hinn 45 ára gamli Dyche hefur náð frábærum árangri með Burnley. Hann hefur tvisvar sinnum komið liðinu upp í ensku úrvalsdeildina og hélt því þar í vetur.

Jóhann Berg Guðmundsson og félagar í Burnley enduðu í 16. sæti deildarinnar en voru þrátt fyrir það aldrei í fallbaráttu, aðallega vegna frábærs árangurs á heimavelli.

Palace hafði einnig áhuga á Marco Silva, fyrrverandi stjóra Hull City. Hann var hins vegar tilkynntur sem nýr stjóri Watford í dag.

Þá ku Roy Hodgson hafa áhuga á að taka við Palace. Hodgson hefur ekki þjálfað síðan hann sagði af sér sem þjálfari enska landsliðsins eftir tap fyrir því íslenska í 16-liða úrslitum á EM í fyrra.