Juncker segir Evrópuþingmenn sýna Möltu lítilsvirðingu

Einungis á fjórða tug Evrópuþingmanna voru viðstaddir til að ræða hálfs árs formennskutíð Möltu í ráðherraráðinu í þingsal Evrópuþingsins í Strassbourg í morgun. Formennskutíð Möltu lauk um mánaðamótin.

Jean-Claude Juncker, forseti framkvæmdastjórnar ESB, var greinilega allt annað en ánægður með fámennið í þingsalnum og sagði það sýna að þingmönnum væri ekki alvara.

Antonio Tajani, forseti Evrópuþingsins, gagnrýndi þá Juncker og fór fram á að hann sýndi þinginu virðingu.

„Það er ekki hlutverk framkvæmdastjórnarinnar að hafa eftirlit með Evrópuþinginu. Það er þingið sem á að hafa eftirlit með framkvæmdastjórninni,“ sagði Tajani sem varð nokkuð heitt í hamsi eftir að Juncker sagði þingið vera „hlægilegt“.

„Ég mun ekki koma aftur hingað á svona fund við þessar aðstæður. Þingið verður einnig að bera virðingu fyrir leiðtogum smærri aðildarríkja,“ sagði Juncker.

Malta er fámennasta aðildarríki Evrópusambandsins með um 440 þúsund íbúa.