Tímabilið er undir í Manchester slagnum

Fótbolti Þótt það sé bara komið fram í 16. umferð er ekki hægt að vanmeta mikilvægi Manchester-slagsins. Tímabilið er hreinlega undir hjá Manchester United. Lærisveinar Jose Mourinho verða að vinna til að halda lífi í titilvonum sínum. Ef Manchester City vinnur á Old Trafford nær liðið 11 stiga forskoti. Það eru til dæmi um lið sem hafa tapað niður álíka miklu forskoti en ekkert þeirra var eins sterkt og City-liðið er í dag.

Eftir að hafa rúllað yfir hvert liðið á fætur öðru hefur City þurft að hafa aðeins meira fyrir hlutunum í síðustu þremur deildarleikjum sem enduðu allir 2-1, Manchester-liðinu í vil. Öll þrjú sigurmörkin komu á 83. mínútu eða síðar.

Mikill sóknarþungi

Þótt sigrarnir hafi verið naumari en fyrr á tímabilinu hefur City verið miklu sterkari aðilinn í þessum leikjum. Í síðustu þremur leikjum hefur City t.a.m. átt samtals 64 skot að marki andstæðinganna. Strákarnir hans Peps Guardiola sækja, sækja og sækja meira og á endanum ber pressan árangur.

En ef eitthvert lið getur haldið City-sókninni í skefjum er það United sem hefur á að skipa bestu vörn og besta markverði deildarinnar. United hefur aðeins fengið á sig níu mörk og haldið níu sinnum hreinu í 15 deildarleikjum í vetur. Það veikir United þó mikið að Paul Pogba er í leikbanni og má ekki spila á morgun.

Ósigrandi á heimavelli

Old Trafford hefur verið óvinnandi vígi undanfarna mánuði. United jafnaði félagsmet þegar liðið vann CSKA Moskvu, 2-1, í Meistaradeild Evrópu á þriðjudaginn. United hefur nú leikið 40 heimaleiki í röð án þess að tapa.

Síðasta tap United á Old Trafford kom einmitt gegn nágrönnunum í City í september í fyrra. Síðan þá hefur United leikið 40 heimaleiki; unnið 29, gert 11 jafntefli, skorað 85 mörk og aðeins fengið á sig 17.

Það hefur ekki skipt City-menn neinu máli hvort þeir spila á heima- eða útivelli á þessu tímabili. Þeir vinna alla leiki. City hefur unnið 13 leiki í deildinni í röð og ef liðið vinnur á Old Trafford á morgun jafnar það met Arsenal frá 2002.

Án sigurs á þessari öld

Leikur Manchester-liðanna er ekki eini grannaslagurinn á dagskrá á morgun. Klukkan 14.15 verður flautað til leiks í leik Liverpool og Everton á Anfield. Þetta verður fyrsti Bítlaborgarslagurinn sem Gylfi Þór Sigurðsson tekur þátt í.

Tölfræðin er ekki með Everton í liði en liðið hefur ekki unnið á Anfield á þessari öld. Síðasti sigur Everton á Anfield kom í september 1999. Síðan þá hafa liðin mæst í 17 deildarleikjum á Anfield. Liverpool hefur unnið níu þeirra og átta sinnum hefur orðið jafntefli.