Þjálfaralausir Bæjarar misstu niður tveggja marka forystu

Hertha Berlin og Bayern Munchen skildu jöfn í þýsku Bundesligunni í dag þegar liðin mættust í þýsku höfuðborginni.

Carlo Ancelotti var látinn taka pokann sinn á dögunum og stýrði Willy Sagnol liðinu í dag. Það byrjaði vel því mörk frá Mats Hummels og Robert Lewandowski komu Bæjurum í góða stöðu.

Heimamenn neituðu þó að gefast upp því Ondrej Duda minnkaði muninn á 51.mínútu áður en Salomon Kalou jafnaði metin á 56.mínútu. Fleiri urðu mörkin ekki og Bayern því komið fimm stigum á eftir toppliði Borussia Dortmund eftir sjö umferðir.