Fimmtán ára drengur játar að hafa myrt tvo í Kristiansand

Fimmtán ára drengur hefur viðurkennt að hafa myrt fjórtán ára dreng og konu á fimmtugsaldri í Kristiansand í Noregi á mánudag.

Norska lögreglan greindi frá þessu á fréttamannafundi í morgun.

Drengurinn viðurkenndi að hafa stungið hinn fjórtán ára Jakob Abdullahi Hassan og leikskólakennarann Tone Ilebekk við Wilds Minne skólann í gær. Hann á að hafa kannast við Jakob, en ekki Ilebekk.

Hinn grunaði var handtekinn klukkan 21 í gærkvöldi að staðartíma.

„Játningin drengsins kemur í kjölfar umfangsmikillar rannsóknar lögreglu fyrstu þrjátíu tímana eftir morðið,“ segir Terje Skaar, talsmaður lögreglu.

Lögregla segir að drengurinn hafi gefið ítarlegar skýringar á ástæðum morðanna, en að frá þeim verði ekki greint opinberlega að svo stöddu.

Skaar segir að ekkert bendi til að fleiri en einn hafi staðið að verki.