Hakkari segist hafa hakkað forseta Mexíkó alla leið á forsetastólinn

Stafræn myrkraherferð af hálfu hakkara varð til þess að Enrique Peña Nieto, forseti Mexíkó, náði kjöri árið 2012. Þessu heldur Andrés Sepulveda fram, kólumbískur hakkari sem nú situr í fangelsi þar í landi.

Sepulveda heldur því fram að hann og hópur hakkara hafi fengið 600 þúsund dollara, um 70 milljónum króna, til umráða til þess að grafa undan herferð helstu andstæðinga Nieto í forsetakosningunum. Það hafi hakkararnir gert með því koma fyrir forritum í tölvum í höfuðstöðvum keppinauta Nieto.

Þannig hafi þeir getað fylgst með tölvum og símum, séð ræður og önnur undirbúningsgögn ásamt skipulagi kosningarherferðar helstu andstæðinga Nieto í kosningunum. Með þessum upplýsingum útbjuggu hakkaranir aragrúa af gervi-twitter reikningum til þess að ýta umræðum um kosningarnar í átt að málefnum sem hentuðu kosningaherferð Nieto best.

„Þegar ég áttaði mig á því að ég fólk trúir nánast öllu því sem er sagt á internetinu áttaði ég mig á því að hafði vald til þess að láta fólk trúa nánast hverju sem er,“ sagði Sepulveda í samtali við Bloomberg.

Lét hringja í kjósendur í nafni andstæðinga Nieto að nóttu til

Nefndi hann dæmi um þær aðgerðir sem hann og félagar hans gripu til. Í hinu íhaldsama og kaþólska héraði Tabasco í Mexíkó stofnuðu þeir gríðarmikinn fjölda af Facebook-reikningum samkynhneigðra manna sem þóttust styðja andstæðinga Nieto. Þá setti Sepulveda einnig upp úthringiherferð þar sem hringjendur hringdu í stórum stíl í nafni andstæðinga Nieto klukkan þrjú að nóttu til.

Segir Sepulvelda að hann hafi verið fenginn til þess að beita svipuðum aðferðum síðastliðin átta ár víðsvegar í ríkjum Suður-Ameríku, þar á meðal í Venesúela, Guatemala, Kosta Ríka og Hondúras. Sepulvelda afplánar nú tíu ára dóm í Kólumbíu fyrir svipað athæfi.

Hann segir þó að flestir þeirra stjórnmálamanna sem notið hafi aðstoðar sinnar hafi ekki vitað af aðgerðum sínum. Yfirleitt hafi millistjórnendur í herferðum þeirra leitað til sín. Talsmaður stjórnmálaflokks forseta Mexíkó segist ekki hafa vitneskju um að Sepulvelda hafi starfað fyrir flokkinn, hvorki fyrr né síðar.