Lögreglu auðvelduð upplýsingaskipti

Samningur milli Bandaríkjanna og Evrópusambandsins um meðferð persónugagna í samskiptum lögregluyfirvalda var undirritaður í Hollandi í gær.

Í aðra röndina er samningnum ætlað að auðvelda samstarf lögregludeilda í Bandaríkjunum og aðildarríkjum Evrópusambandsins. Auðveldara verður að skiptast á upplýsingum milli landa í lögreglumálum.

Á hinn bóginn á samningurinn að tryggja vernd persónuupplýsinga í slíku samstarfi. Efasemdir hafa þó verið viðraðar um þennan þátt samningsins, meðal annars á vettvangi Evrópuþingsins.

Evrópuþingið á reyndar eftir að greiða atkvæði um samninginn, þannig að þótt hann hafi verið undirritaður hefur hann ekki verið staðfestur og tekur ekki gildi fyrr en eftir að því ferli er lokið.

Samninginn undirrituðu þau Loretta Lynch, dómsmálaráðherra Bandaríkjanna, og Vera Jour­ova, sem sér um dómsmál í framkvæmdastjórn Evrópusambandsins, ásamt Ard van der Steur, dómsmálaráðherra Hollands, en Holland fer nú með formennsku í framkvæmdastjórninni.

Van der Steur sagði samninginn standa fyrir þau siðferðilegu gildi, sem Evrópusambandið og Bandaríkin hafa í hávegum. „Hann mun efla samstarf milli lögregluyfirvalda í Bandaríkjunum og Evrópu í baráttunni gegn alvarlegum glæpum og hryðjuverkum,“ sagði hann, og bætti við: „Hann mun ýta undir það að full virðing verði borin fyrir grundvallarréttindum í hvert skipti sem skipst er á persónugögnum milli okkar.“

Samningurinn var gerður í september síðastliðnum, en samningaviðræður höfðu þá staðið yfir frá árinu 2010.

Þeim var svo hraðað eitthvað árið 2013 í kjölfarið á uppljóstrunum Edwards Snowden, sem sýndu að leyniþjónustustofnanir beggja vegna Atlantshafsins höfðu í stórum stíl safnað persónuupplýsingum með því að fylgjast með símtölum og netsamskiptum einstaklinga, fyrirtækja og stofnana.

Eftir að viðræðum lauk, í september síðastliðnum, áttu Bandaríkjamenn þó eftir að gera lagabreytingar sem tryggja að íbúar Evrópuríkja geti leitað réttar síns í Bandaríkjunum með sama hætti og heimamenn.

Bandaríkjaþing samþykkti þær lagabreytingar snemma á þessu ári, en mannréttindasamtök segja þær engan veginn ganga nógu langt.

Fréttin birtist fyrst í Fréttablaðinu 3. júní.