Fyrstu kaup City á árinu staðfest

Ástralska liðið Central Coast Mariners hefur tilkynnt að miðjumaðurinn Athony Caceres er á leið til Manchester City.

Þessi 23 ára leikmaður hefur verið á mála hjá liðinu síðan 2012 og spilað 62 leiki í áströlsku deildinni. „Við ferðum að fagna því þegar Central Coast Mariners selur leikmenn til stærri félaga. Það er okkar markmið,“ sagði Tony Walmsley, þjálfari liðsins.

Þetta er annar leikmaðurinn sem kemur úr áströlsku deildinni til City þetta tímabilið en félagið fékk Luke Brattan frá Brisbane Roar í október. Hann var um leið lánaður til Bolton í ensku B-deildinni.

Fjölmiðlar ytra telja líklegt að Caceres verði einnig lánaður til annars félags og hefur hann verið orðaður við Melbourne City, sem er systurfélag Manchester City. Það vildu forráðamenn Melbourne City þó ekki staðfesta að svo stöddu.