Bráða­birgða­for­seti Brasilíu hvetur íbúa landsins til að standa saman

„Treystið gildum fólksins í landinu og getu okkar til þess að endurbyggja efnahag landsins,“ sagði Michel Temer, bráðabirgðaforseti Brasilíu í ávarpi til þjóðar sinnar. Temer situr nú í forsetastóli á meðan rekstur dómsmáls þingsins gegn Dilmu Rousseff, forseta landsins, stendur yfir. Þetta kemur fram á BBC.

Öldungadeild brasilíska þingsins samþykkti, eftir maraþonfund sem stóð yfir í heila nótt, að samþykkja saksókn á hendur Rousseff. 55 greiddu atkvæði með því en 22 atkvæði gegn. Forsetinn liggur undir grun um að hafa notað opinbert fjármagn í eigin þágu.

Fyrsta verk Temer var að skipta út mönnum í ríkisstjórn landsins. Meðal þeirra sem komu inn má nefna Henrique Meirelles, fyrrverandi seðlabankastjóri landsins, en hann sest í stól fjármálaráðherra.

„Það er nauðsynlegt að koma á friði í Brasiliu á ný. Við verðum að koma á stjórn til að bjarga landinu okkar. Aðalmarkmiðið er að endurbyggja traust fólks á hagkerfinu okkar til að draga að fjárfesta,“ sagði Temer. „Hættum að tala um kreppuna. Gerum eitthvað þess í stað.“

Temer hefur verið varaforseti Rousseff en sagði skilið við flokk hennar í mars eftir að hróp og köll tengd spillingu urðu sífellt háværari. Forsetinn hefur ítrekað sakað varamann sinn um valdarán og tilraun til byltingar.