Klinsmann vill sækja gegn Argentínu

Undanúrslitin í Copa America hefjast í beinni á Stöð 2 Sport í nótt er Bandaríkin spila við Argentínu.

Argentína hefur spilað gríðarlega vel í mótinu og verkefnið því ákaflega erfitt fyrir Bandaríkjamenn.

Bandaríkjamenn töpuðu opnunarleik mótsins en hafa svo verið á góðri siglingu. Þjálfari liðsins, Jürgen Klinsmann, vill að sínir menn sæki gegn Messi og félögum í stað þess að liggja til baka.

„Þetta er sérstök stund fyrir okkar lið. Þetta er tækifæri sem kemur einu sinni á lífstíðinni og ég hef sagt það við drengina,“ sagði Klinsmann.

„Maður kemur stoltur inn í svona leik ákveðinn í að labba stoltur af velli. Ég vil að drengirnir verði hungraðri en áður. Ákveðnari og láti bara vaða í þesum leik. Ef menn gera það þá munum við eiga möguleika.“

Leikurinn hefst klukkan eitt í nótt.