Blanc á förum frá PSG

Laurent Blanc verður ekki lengur þjálfari PSG í lok vikunnar en hann er sagður vera að ganga frá starfslokasamningi við félagið.

Þetta kemur mörgum á óvart enda skrifaði Blanc undir nýjan tveggja ára samning við félagið í febrúar síðastliðnum.

„Blanc verður skilinn við PSG í lok vikunnar,“ sagði umboðsmaður Blanc í útvarpsviðtali. „Þetta er allt gert í mesta bróðerni af báðum aðilum.“

Þó svo PSG sé að vinna frönsku deildina þá hefur árangur liðsins í Meistaradeildinni ekki staðið undir væntingum eigenda félagsins. Liðið hefur aðeins komist í átta liða úrslit undir stjórn Blanc.

PSG ætlar að ráða þjálfara Sevilla, Unai Emery, í hans stað. Hann er búinn að vinna Evrópudeildina þrjú ár í röð með Sevilla.