Wenger neitar að afskrifa Rosicky

Arsene Wenger vildi ekkert segja um hvort að Tékkinn Tomas Rosicky hafi spilað sinn síðasta leik fyrir Arsenal á ferlinum.

Rosicky meiddist nýlega á læri og Wenger staðfesti á blaðamannafundi í dag að hann verður frá í allt að þrjá mánuði.

Miðjumaðurinn öflugi hefur verið á mála hjá Arsenal síðan 2006 en hefur lítið geta spilað undanfarin ár vegna meiðsla. Hann missti af fyrri hluta tímabilsins vegna hnémeiðsla og meiddist svo á læri í bikarleiknum gegn Burnley um helgina, sem var fyrsti leikur hans á tímabilinu.

Wenger var spurður hvort að Rosicky væri nú búinn að spila sinn síðasta leik með Arsenal en því vildi Wenger ekki svara og bætti því við að hann myndi fyrst og fremst veita Rosicky stuðning en ekki afskrifa hann.