Bara geðveik: Í draumaferð í Suður-Afríku en dreymir að tvíburinn sé dáinn

Sól og hiti. Adrenalín og gleði. Davíð Arnar Oddgeirsson er í Suður-Afríku að lifa draumalífi, gera allt það sem honum finnst skemmtilegast, en á morgnana hrekkur hann upp með andfælum eftir að hafa dreymt að tvífari hans og tvíburabróðir sé dáinn. Það skar hann í hjartað að vita af bróður sínum í geðrofi, í sinni fyrstu maníu, hinum megin á hnettinum á meðan hann sjálfur var að skemmta sér konunglega við að uppfylla drauma sína.

Það fer ekkert á milli mála að geðhvarfasýki Brynjars hefur tekið á samband þeirra bræðra, eins og þeir ræða í myndskeiðinu sem hér fylgir og er úr 3. þætti af Bara geðveik. Geðsjúkdómar leggjast á fjölskyldur og lita samskipti hins veika við sína nánustu. Sú staða verður enn erfiðari þegar sá sem veikist er eins og þú. Með nákvæmlega sama DNA. Því ef einn eineggja tvíburi veikist af geðhvörfum eða geðklofa, er hinn tvíburinn í langtum meiri hættu en næsti maður á að veikjast líka.

Brynjar er einn fjórum hugrökkum Íslendingum sem ákváðu að hleypa Lóu Pind og Agli Aðalsteinssyni myndatökumanni inn í líf sitt. Þau hafa fylgst með Brynjari, Ágústu Ísleifsdóttur, Silju Björk Björnsdóttur og Bjarneyju Vigdísi Ingimundardóttur mánuðum saman, sumum í tæplega ár til að fá djúpa innsýn í tilveru fólks með geðsjúkdóma.

Þriðji þáttur af sex í heimildaþáttaseríunni Bara geðveik fer í loftið á Stöð 2 í kvöld kl. 20:00. Lóa Pind Aldísardóttir hefur umsjón með þáttunum, Egill Aðalsteinsson er myndatökumaður og Ómar Daði Kristjánsson sér um klippingu. Í 3. þætti áttum við okkur á því af hverju kærasti Silju hefur skilning á þunglyndi og kvíða, við hittum systkini Ágústu í Breiðholtinu og hittum í fyrsta sinn eineggja tvíbura Brynjars Orra.