Kveikt í jólageitinni í Gävle sama dag og hún var sett upp

Kveikt var í jólageitinni í bænum Gävle í Svíþjóð í dag, sama dag og hún var sett upp. Aftonbladet greinir frá þessu og birtir myndband af atvikinu.

Um er að ræða jólageitina í bænum en hún tilheyrir sænskri jólahefð sem kallast Gävlebocken. Gävle, borið fram sem Jevle, er bær í Svíþjóð. Geitin þar í bæ er sú frægasta en hún hlýtur oftast þau örlög að verða brennuvörgum að bráð. IKEA geitin sem við Íslendingar þekkjum á rætur sínar að rekja til Gävle.

Þetta er einnig mikið vandamál hér á landi en fyrr í mánuðinum greindi Vísir frá því að IKEA geitin hefði brunnið til ösku af völdum brennuvarga.

Geitin var sett upp seinni part dags í dag en rétt eftir klukkan ellefu að staðartíma bárust lögreglu þær upplýsingar að hún stæði í ljósum logum. Stendur nú yfir rannsókn á málinu.

„Við erum nú á fullu að  leita að sökudólgnum og eru til skoðunar vitni á vettvangi“ segir Matilda Isaksson, yfirmaður lögreglu á svæðinu.