Sif sá gult og skoraði mark | Öruggt hjá Wolfsburg og Avaldsnes

Sif Atladóttir skoraði mark Kristianstads í 1-3 tapi gegn Göteborg í sænsku úrvalsdeildinni í knattspyrnu í dag.

Sif jafnaði metin fyrir gestina í Kristianstads á 68. mínútu og fékk gult spjald átta mínútum síðar.

Var þetta fyrsta mark hennar fyrir félagið og fyrsta mark hennar fyrir félagslið í tæplega sex ár.

Leikmönnum Göteborg tókst að kreista fram sigurinn á lokamínútunum eftir góðan undirbúning Adelina Engman en Engman skoraði annað mark sitt í leiknum og þriðja mark Göteborg í uppbótartíma.

Í Noregi fékk Hólmfríður Magnúsdóttir einnig gult spjald en komst ekki á blað í 3-0 sigri Avaldsnes á Klopp.

Þórunn Helga Jónsdóttir lék síðustu mínútur leiksins fyrir Avaldsnes sem hefur nú unnið fjóra leiki í röð.

Þá lyftu Sara Björk Gunnarsdóttir og stöllur í Wolfsburg sér upp í efsta sæti þýsku deildarinnar með 2-0 sigri á Duisburg.

Sara lék allan leikinn á miðjunni hjá Wolfsburg en hún bíður enn eftir fyrsta marki sínu fyrir félagið.

Ungverski miðjumaðurinn Zsanett Jakabfi kom Wolfsburg yfir en Alexandra Popp gulltryggði sigurinn undir lok venjulegs leiktíma.