Dómsmálaráðuneyti Bandaríkjanna hyggst hætta notkun einkarekinna fangelsa

Bandaríska dómsmálaráðuneytið hefur tekið þá ákvörðun að hætta notkun einkarekinna fangelsa í Bandaríkjunum. Bæði telja embættismenn ráðuneytisins þau vera minna örugg og veita verri betrunarvist en ríkisrekin fangelsi. Þetta kemur fram í frétt Washington Post.

Samkvæmt skýrslu frá eftirlitsmanni á vegum ráðuneytisins sem gefin var út í seinustu viku eru einkarekin fangelsi slakari þegar kemur að þjónustu við fanga og öryggis- og eftirlitsmálum heldur en sambærileg ríkisrekin fangelsi. Til að mynda eru líkamsárásir, bæði meðal fanga og fangavarða, mun fleiri í þeim einkareknu auk þess sem uppþot meðal fanga eru algengari og hafa oft mjög alvarlegar afleiðingar.

Í maí 2012 olli uppþot meðal fanga í Adams County Correctional Center í Mississippi í Bandaríkjunum því að tuttugu manns særðust og fangavörður var myrtur. Orsök uppþotsins má samkvæmt skýrslu stofnunarinnar rekja til óánægju fanga með gæði matar og skort á læknisþjónustu.

Samkvæmt minnisblaði frá aðstoðardómsmálaráðherra, Sally Yates, er stefnan tekin á það að draga úr, eða endurnýja ekki samninga við stjórnendur einkarekinna fangelsa. Markmiðið er svo að hætta algerlega notkun þeirra.

Nær þetta til þrettán stofnana í Bandaríkjunum sem samtals hýsa um 22 þúsund fanga.