Fimm fórust þegar rússneskri herþyrlu var grandað

Fimm létu lífið þegar rússnesk herþyrla var skotin niður í Sýrlandi fyrr í dag. Þyrlan var á leið frá Aleppo en þangað hafði hún flutt matvæli, lyf og vatn til íbúa. Þetta kemur fram á vef BBC.

Talið er líklegt að liðsmenn uppreisnarmanna hafi skotið þyrluna niður. Á síðum á vefnum má sjá myndir og myndbönd af braki þyrlunnar. Á einu þeirra sést að auki hvar traðkað er á líki eins hermannsins.

Þetta er mesta mannfall sem Rússar hafa orðið fyrir, innan sýrlensku landamæranna, síðan þeir hófu afskipti af borgarastyrjöldinni í Sýrlandi. Í síðasata mánuði var önnur rússnesk þyrla skotin niður en þá létust tveir. Jafn margir fórust í nóvember þegar herþota hrapaði eftir að hafa orðið fyrir skoti frá Tyrkjum. Tyrkir sökuðu þá Rússa um að rjúfa lofthelgi landsins.