Íbúðir fyrir tekjulága úti á landi möguleiki

Húsnæðismál  Kannaður verður möguleikinn á byggingu leiguíbúða fyrir tekjulágt launfólk á höfuðborgarsvæðinu og á landsbyggðinni. Þetta segir Gylfi Arnbjörnsson, forseti ASÍ. Tilkynnt var um helgina að Alþýðusambandið hefði stofnað íbúðafélag og að Alþýðusambandið og Reykjavíkurborg ætli að byggja eitt þúsund íbúðir fyrir tekjulágt launafólk á næstu fjórum árum. „Við munum í framhaldinu leita hófanna í nokkrum sveitarfélögum höfuðborgarinnar og síðan vítt og breitt um landið,“ segir Gylfi. „Félagið sem slíkt verður landsfélag og auðvitað eru full áform um það að sinna öllu.“ Íbúðafélagið verður stofnað um leið og Alþingi hefur afgreitt frumvarp félags- og húsnæðismálaráðherra um almennar íbúðir. Logi Einarsson, bæjarfulltrúi Akureyrarbæjar, segist nú þegar búinn að ræða hugmyndina um byggingu íbúða fyrir tekjulága á Akureyri við bæjarstjórann. „Við munum taka þetta til umræðu á næsta bæjarráðsfundi og væntanlega formlega fela bæjarstjóra að hafa samband við ASÍ og bjóða þeim í heimsókn til okkar og skoða fletina á því að halda þessu áfram. Það er flott að þeir hafi náð saman við Reykjavíkurborg, en ég held að það séu sóknarfæri hérna líka,“ segir Logi. Logi telur gott og viðráðanlegt verkefni að byggja fjörutíu íbúðir á ári á næstu fjórum til fimm árum, eða rúmlega 150 íbúðir á Akureyri.  Gylfi segir að það fari eftir eðli máls í hvaða aðgerðir verði ráðist. „Víða á landsbyggðinni er húsnæðiskostnaður ekki vandamál og alveg ljóst að víða væri það þannig að þrátt fyrir þessi lög þá myndi leiga í þessu kerfi, ef byggt yrði nýtt á þessum stöðum, vera miklu hærri en fólki stendur nú til boða.“ Þóroddur Bjarnason, fyrrverandi formaður stjórnar Byggðastofnunar, segist treysta því að Alþýðusambandið muni byggja leiguhúsnæði út um allt land. „Það vantar úti um allt land gríðarlega mikið af leiguhúsnæði. Fólk er tregt til að kaupa á stöðum þar sem fasteignamarkaðurinn hefur verið mjög kaldur og fólk óttast að ef það myndi kaupa hús gæti það ekki selt það aftur. Á þeim stöðum er gríðarleg eftirspurn eftir leiguhúsnæði.“ saeunn@frettabladid.is