Tottenham mistókst að komast á toppinn

Tottenham mistókst að skjótast á topp ensku úrvalsdeildarinnar í knattspyrnu, en Tottenham tapaði 1-0 fyrir grönnum sínum í West Ham í kvöld.

Eina mark leiksins kom á sjöundu mínútu leiksins, en það skoraði Michail Antonio eftir undirbúning frá hinum frábæra Dimitri Payet.

Fleiri urðu mörkin ekki og frábær sigur West Ham staðreynd, en Tottenham tókst ekki að komast á toppinn. Þeir eru í öðru sæti deildarinnar, þremur stigum á eftir toppliði Leicester.

West Ham er í sjötta sætinu, Evrópusæti, með 46 stig, en grannarnir Manchester United og Manchester City eru í næstu tveimur sætum fyrir ofan bæði með 47 stig.