Döpur aflabrögð á Íslandsmiðum úr mikilvægum fiskistofnum

Afli íslenskra skipa í úthafskarfa hefur aldrei verið minni en á síðasta fiskveiðiári, eða síðan íslensk skip hófu beina sókn í tegundina á miðunum á Reykjaneshrygg. Á síðustu vertíð veiddu þau aðeins 2.128 tonn af úthafskarfa samanborið við 2.436 tonn árið áður sem þá var allra minnsti afli til þessa.

Mikið samdráttartímabil í afla á úthafskarfa á Reykjaneshrygg kristallast í því að aflamark íslenskra skipa á nýliðnu ári var 3.244 tonn og voru íslensk skip því nokkuð frá því að veiða upp í aflamarkið. Aflamark komandi vertíðar er 2.614 tonn.

Í frétt Fiskistofu kemur fram að á „velmektarárum úthafs­karfaveiðanna á Reykjaneshrygg fór heildarafli íslensku skipanna oft yfir 40 þúsund tonn. Aflinn á síðustu tveimur vertíðum er því aðeins svipur hjá sjón.“

Íslendingar veiddu á síðasta ári 42.626 tonn af norsk-íslenskri síld. Þetta er minnsti afli íslenskra skipa úr þessum síldarstofni síðan 1994 eða í rúm tuttugu ár. Aflamark íslenskra skipa í norsk-íslenskri síld á árinu 2015 var rúmlega 45 þúsund tonn en verður litlu meira á komandi vertíð eða rétt tæplega 48 þúsund tonn.

Betri fréttir eru af kolmunna- og makrílveiðum. Á síðasta ári veiddu íslensk skip 214.890 tonn af kolmunna. Þetta er mesti ársafli íslenskra skipa á tegundinni síðan 2007. Til að mynda var aflinn 5.882 tonn árið 2011 eða aðeins 2,7% af afla síðasta árs.

Makrílafli íslenskra skipa á síðasta ári var 169.336 tonn en var árið áður 173.560 tonn. Þetta var samdráttur upp á 2,4% milli ára. Af þessum afla voru 148.280 tonn fengin úr íslenskri lögsögu eða 87,6% aflans.