Stefna að sjálfvirku flokkunarkerfi á öllum stöðvum

Stefnt er að því að koma á sjálfvirku flokkunarkerfi á öllum endurvinnslustöðvum Sorpu fyrir skilagjaldsskyldar umbúðir, það er að segja gler- og plastflöskur og dósir.

Frá því kerfin voru tekin í notkun á endurvinnslustöðvum Sorpu í Hafnarfirði og á Granda á síðasta ári hefur meira magni af umbúðum verið skilað þangað að sögn Guðmundar Tryggva Ólafssonar, rekstrarstjóra endurvinnslustöðva Sorpu.

„Þetta hefur fengið góðar viðtökur. Það hefur verið aukning í skilum síðan þetta var tekið í notkun,“ segir Guðmundur.

Þá segir Guðmundur nýja kerfið krefjast minna af þeim sem skila sem og af starfsmönnum. Vélin les strikamerki á umbúðum. Það eina sem sá sem skilar þurfi að hugsa um sé að halda umbúðunum heilum.

Þórhildur Þorleifsdóttir, leikstjóri og fyrrum þingmaður Kvennalistans, var á endurvinnslustöð Sorpu á Granda í gær að skila dósum og flöskum. „Ég geri allt sem ég get til að stuðla að aukinni endurvinnslu og reyni að draga úr notkun einnota umbúða,“ segir Þórhildur.

Að sögn Þórhildar vandist hún á að flokka alls konar rusl þegar hún bjó um skeið í Þýskalandi.

„Svo reyndi ég að halda því áfram þegar heim var komið, þótt manni sé ekki alltaf auðveldað það,“ segir Þórhildur. „Maður hefur stundum þurft að standa úti í rigningu og roki að reyna að troða flöskum í einhvern gám. Þá hefur maður verið nærri því að fara og segja endurvinnslunni að eiga þetta bara.“

Vinkonurnar Sigurbjörg Björnsdóttir og Matthildur Sigrúnardóttir voru einnig í Sorpu að skila umbúðum. Þær segjast skila einu sinni á ári þegar flöskurnar og dósirnar hafa safnast upp. Þá nýta þær búbótina í að kaupa sér eitthvað skemmtilegt en nú fást sextán krónur á hverja einingu.

„Við erum tiltölulega nýfluttar inn saman og það er fínt að fara svona saman fjölskyldan og skila,“ segir Sigurbjörg.