Inaki Williams gæti verið á leiðinni til Liverpool

Liverpool hafa áhuga á því að klófesta framherjann Inaki Williams frá Athletic Bilbao en þessi 21 árs leikmaður kom til félagsins árið 2012.

Á þessu tímabili hefur framherjinn skorað tíu mörk í 21 leik og samkvæmt The Guardian mun Liverpool bjóða í leikmanninn í þessum félagaskiptaglugga.

Samkvæmt sömu heimildum er Williams með klásúlu í sínum samningi sem gerir það að verkum að hann má yfirgefa spænska liðið ef það kemur til boð upp á 16 milljónir punda.

Liverpool mætir Manchester United síðar í dag og má búast við mikilli spennu á Anfield en það er alltaf allt undir þegar þessi lið mætast.