Dagný deildarmeistari

Dagný Brynjarsdóttir lék síðustu 20 mínúturnar þegar Portland Thorns tryggði sér sigur í bandarísku deildinni í fótbolta með því að leggja Sky Blue að velli, 1-3.

Þetta var síðasti leikurinn í deildarkeppninni en Portland mætir Western New York Flash í undanúrslitum úrslitakeppninnar. Í hinni undanúrslitaviðureigninni mætast Washington Spirit og Chicago.

Þetta er í fyrsta sinn sem Portland verður deildarmeistari. Liðið setti stigamet með því að ná í 41 stig í 20 leikjum og þá hefur ekkert lið unnið fleiri leiki (12) á einu tímabili í deildarkeppninni.

Dagný lék 17 af 20 deildarleikjum Portland á tímabilinu og skoraði fimm mörk. Hún er á sínu fyrsta tímabili með liðinu.

Fyrsti leikur Portland í úrslitakeppninni er gegn New York 2. október næstkomandi.