Gerrard: Sterling þarf að mannast

Steven Gerrard hefur gagnrýnt Raheem Sterling, fyrrum liðsfélaga sinn hjá Liverpool, og sagt að þessi tvítugi kappi þurfi að fullorðnast.

Sterling er sagður vilja losna frá Liverpool en Manchester City hefur tvívegis lagt fram tilboð í hann. Hann hafnaði nýju samningstilboði Liverpool fyrr í vetur en hefur ekki mætt á æfingar síðustu tvo daga hjá Liverpool.

Sterling hefur í báða dagana hringt og sagst vera veikur. Hann mun einnig hafa farið fram á það að sleppa við æfingaferð Liverpool til Asíu og Ástralíu en liðið leggur af stað á sunnudag.

„Ég er ekki ánægður með allt það sem hefur verið í gangi og ég tel að þetta sé algjör óþarfi. Það þurfa allir að taka á þessu máli eins og fullorðnir menn,“ sagði Gerrard við enska fjölmiðla í kvöld.

„Raheem þarf að ræða við bæði eigendur félagsins og Brendan [Rodgers, knattspyrnustjóra] sjálfan. Hann þarf að segja þeim hvað hann vill gera. Hann á ekki að nota veikindi sem afsökun og neita því að fara í æfingaferðina.“

„Það eru til milljónir stuðningsmanna um allan heim sem vilja ólmir sjá Raheem Sterling í búningi Liverpool. Ég tel því að hegðun hans sé ósanngjörn.“

Sterling er samningsbundinn Liverpool til 2017 en samkvæmt enskum fjölmiðlum hefur Sterling ekki áhugá að spila með félaginu svo lengi sem að Brendan Rodgers verður við stjórnvölinn.