Sunderland býður í leikmann ársins í Hollandi

Sunderland hefur gert tilboð í hollenska miðjumanninn Georginio Wijnaldum sem leikur með PSV Eindhoven.

Tilboðið hljóðar upp á 11 milljónir punda en erkifjendur Sunderland, Newcastle United, er einnig taldir hafa áhuga á Wijnaldum.

Miðjumaðurinn, sem hefur leikið 19 landsleiki fyrir Holland, var valinn leikmaður ársins í hollensku deildinni á síðasta tímabili.

Wijnaldum var í lykilhlutverki hjá PSV sem varð meistari í fyrsta sinn síðan 2008 en hann skoraði 14 mörk af miðjunni á síðasta tímabili.

Sunderland endaði í 16. sæti ensku úrvalsdeildarinnar í vetur en Hollendingurinn Dick Advocaat verður áfram við stjórnvölinn hjá liðinu.