Langþráð mark Di Maria tryggði sigurinn

Angel Di Maria svaraði gagnrýnisröddunum í kvöld er hann tryggði PSG sigur á Rennes í frönsku úrvalsdeildinni, 1-0.

Di Maria skoraði markið stundarfjórðungi fyrir leikslok en með sigrinum jók PSG forystu sína á toppi deildarinnar í tíu stig.

PSG mætir Real Madrid í Meistaradeild Evrópu á þriðjudag og ákvað Laurent Blanc, stjóri frönsku meistaranna, að hvíla sóknarmanninn Edinson Cavani í kvöld.

Di Maria lék með Real Madrid áður en hann var seldur þaðan til Manchester United fyrir rúmu ári síðan. Hann kom svo til Parísar í sumar en markið í kvöld var hans þriðja á tímabilinu og fyrsta síðan í lok september.

Rennes er í sjöunda sæti deildarinnar með sautján stig.