Eigandi Man. City er fjórum sinnum ríkari en næsti eigandi í deildinni

Sheik Mansour, eigandi Manchester City, er langríkasti eigandi í ensku úrvalsdeildinni í dag en þetta kemur fram í samantekt hjá enska blaðinu The Mirror.

Roman Abramovich, rússneski eignandi Chelsea, var sá ríkasti þegar hann kom eins og stormsveipur inn í ensku úrvalsdeildina en er nú langt á eftir í öðru sætinu. Í raun er eigandi Manchester City fjórum sinnum ríkari en Abramovich samkvæmt útreikningum blaðamanna The Mirror.

Sheik Mansour er arabískur fursti og heitir fullu nafni Mansour bin Zayed Al Nahyan. Hann er varaforsætisráðherra Sameinuðu furstadæmanna og eigur hans eru metnar á 4191 milljarða íslenskra króna.

Sheik Mansour hefur sett mikinn pening inn í Manchester City og það hefur þegar skilað félaginu þremur stórum titlum á undanförnum fimm tímabilum en fjárfestingahópur furstans keypti félagið árið 2008.  

Roman Abramovich hefur einnig sett mikinn pening inn í Chelsea og það hefur skilað félaginu níu stórum titlum þar af vannst enska úrvalsdeildin í fjórða sinn síðasta vor.

Joe Lewis hjá Tottenham er síðan einn af þremur eigendum í ensku úrvalsdeildinni sem er meira en þúsund milljarða virði talið í íslenskum krónum. Hann er ríkari en Stan Kroenke, eigandi Arsenal.

Það vekur kannski einhverja athygli að John Henry, eigandi Liverpool, er aðeins í tíunda sæti listans og að Morgan-fjölskyldan sem á lið Gylfa Þórs Sigurðssonar, Swansea City, er einu sæti frá botninum.

Hér fyrir neðan má sjá allan lista The Mirror og ríkidæmi eigendanna, bæði talið í enskum pundum og íslenskum krónum.

Allur listinn

1. Mansour bin Zayed Al Nahyan, Manchester City - 20 milljarðar enskra punda (4145 milljarðar íslenskra króna)

2. Roman Abramovich, Chelsea - 5,3 milljarðar enskra punda (1098 milljarðar)

3. Joe Lewis, Tottenham -  4,9 milljarðar (1015 milljarðar)

4. Stan Kroenke, Arsenal - 4 milljarðar (829 milljarðar)

5. Mike Ashley, Newcastle - 3,5 milljarðar (725 milljarðar)

6. Glazer fjölskyldan, Manchester United - 3 milljarðar (621 milljarður)

7. Ellis Short. Sunderland - 2,4 milljarðar (497 milljarðar)

8. Katharina Liebherr, Southampton - 1,9 milljarðar (394 milljarðar)

9. Vichai Srivaddhanaprabha, Leicester - 1,4 milljarðar (290 milljarðar)

10. John Henry, Liverpool - 1 milljarður (207 milljarðar)

11. Coates fjölskyldan, Stoke - 925 milljónir enskra punda (192 milljarðar)

12. David Sullivan, West Ham - 850 milljónir (176 milljarðar)  

13. Randy Lerner, Aston Villa - 640 milljónir (133 milljarðar)   

14. Giampaolo Pozzo, Watford - 120 milljónir (25 milljarðar)  

15. Maksim Demin, Bournemouth - 100 milljónir (20,7 milljarðar)  

16. Jeremy Pearce, West Bromwich - 50 milljónir (10,4 milljarðar)   

17. Steve Parish, Crystal Palace - 45 milljónir (9,3 milljarðar)   

18. Bill Kenwright, Everton - 33 milljónir (6,8 milljarðar)

19. Morgan fjölslyldan, Swansea - 32 milljónir (6,6 milljarðar)

20. Delia Smith og Michael Wynn Jones, Norwich - 23 milljónir (4,8 milljarðar)