Ræder-listi Snoop Dogg: Djúpsteiktur kjúklingur og sígarettur en engar limosínur

Bandaríski rapparinn Snoop Dogg sem treður upp í Laugardalshöllinni í kvöld undir nafninu DJ Snoopadelic, sendir allajafnan ítarlegan lista á tónleikahaldara með ýmsum kröfum. Á svokölluðum „ræder-lista“, sem kappinn hefur sent á tónleikahaldara og Fréttablaðið hefur undir höndum er ætlast til þess að ákveðnir hlutir séu til staðar svo að allt fari vel fram.

Á listanum kemur fram að Snoop vilji fá nokkrar gæðategundir af ýmsu áfengi. Hann biður um fjórar flöskur af ísköldu Moet Rosay kampavíni, tvær flöskur af ísköldu Ciroc Vodka, tvær flöskur af ísköldu Patrón tekíla og tvær flöskur af Hennesy XO koníaki. Allar flöskurnar skulu vera að minnsta kosti 750 ml.

Djúpsteiktan kjúkling á disk Snoop

Ofan á allt þetta fer Snoop fram á að fá 24 flöskur af ísköldum Red Bull orkudrykk, 36 flöskur af ísköldum Premium bjór og 24 flöskur af ísköldu vatni. Þá eru ávaxtasafar eins og ananas- og appelsínusafar einnig á listanum.

Hvað varðar snæðing, þá vill rapparinn samkvæmt heimildum Fréttablaðsins fá djúpsteiktan kjúkling og er það mjög mikilvæg máltíð. Að auki vill hann hafa val um tvo aðra rétti sem að jafnaði eru ýmist steiktur fiskur, BBQ-rif, lasanja eða nautakjöt.

Kappinn gerir einnig ráð fyrir að grípa í sígaretturnar hér á landi og gerir kröfur um að sex pakkar af Marlboro Lights séu til staðar fyrir hann. Að ógleymdum nýjum, hreinum og hvítum handklæðum þegar Snoop þarf á þeim að halda. 

Vill aðeins ferðast á Mercedes Vito

„Það kom maður á hans vegum á mánudag til landsins, sem er að taka út svæðið. Snoop sendir fólk á undan sér til að kanna hvort allt sé ekki örugglega nógu gott og hvort allt sé til staðar,“ segir Kristinn Bjarnason, einn skipuleggjenda tónleikana. Hann neitar þó að tjá sig frekar um kröfur kappans.

Snoop lendir hér á landi í dag. Slíkur reynslubolti og kanóna gerir að sjálfsögðu miklar kröfur hvað varðar samgöngur enda hefur hann ferðast um allan heim í fjölda ára. Kröfurnar eiga einnig við um samgönguhætti hér á landi, því hann vill eingöngu ferðast á milli staða á svartri extra stórri Mercedes Vito lúxus sendibifreið og tekur fram að hann vilji ekki sjá limósínur. 

Engin leikjatölvukrafa

Það sem kemur hvað helst á óvart er að hann gerir ekki kröfu um leikjatölvu í þetta skiptið því undanfarin ár hefur kappinn viljað geta gripið í Play Station-tölvu eða Xbox-tölvu á tónleikaferðalögum sínum. 

Laugardalshöllinni hefur nú verið breytt í heljarinnar klúbb og mun Snoop stýra tæplega þriggja klukkustunda partíi. 

„Það er búið að setja upp brjálað hljóðkerfi og ljósakerfi sem ekki hefur verið sett upp áður í Höllinni. Þetta verður hipphopp-tónlistarveisla sumarsins, sem verður á heimsmælikvarða og upplifun sem enginn má missa af,“ segir Kristinn fullur tilhlökkunar. Ásamt Snoop Dogg koma fram Blaz Roca, Úlfur Úlfur, DJ Benni B-Ruff, Shades of Reykjavík og KSF ásamt Alvia Islandia. 

Miðasala fer fram á midi.is.