Hefði verið hægt að komast hjá mistökum með samráði

Margt fór úrskeiðis við undirbúning þess að sameina ferðaþjónustu fatlaðra á höfuðborgasvæðinu hjá Strætó bs. Þetta er niðurstaða sérstakrar stjórnar sem sett var yfir ferðaþjónustu fatlaðra í febrúar. Nefndin skilaði frá sér skýrslu í gær eftir fjögurra vikna vinnu en Stefán Eiríksson, sviðsstjóri á Velferðarsviði Reykjavíkurborgar, leiddi stjórnina.

„Það er alveg ljóst, eins og segir í skýrslunni, að það var mjög margt sem fór úrskeiðis við undirbúning verkefnisins, bæði hjá sveitarfélögunum og Strætó. Þetta hefði verið hægt að laga að stóru leyti ef samráð við hagsmunasamtökin og notendur hefði verið meira í þessu innleiðingar- og framkvæmdaferli,“ segir Stefán.

Tillögur stjórnarinnar snúa meðal annars að því að ferðir verði í mun meiri mæli skipulagðar með föstum hætti, sveigjanleiki þjónustunnar verði aukinn, sérstakir þjónustufulltrúar verði í þjónustuveri fyrir ferðaþjónustuna og sérhæfing þar aukin. Auk þess er lagt til að hlutlaus úttekt verði gerð á tölvukerfi og símkerfi í þjónustunni og þjálfun bílstjóra aukin.

„Í skýrslunni gerum við tillögur sem snúa að því að það verði gerðar ákveðnar breytingar í framkvæmdinni til þess að koma til móts við þarfir og óskir notendanna og ekki síður sveitarfélaganna sem bera ábyrgð á þessari þjónustu,“ segir Stefán.

Í skýrslunni segir að verkefni sem þetta sé ekki vel til þess fallið að setja í útboð á þann hátt sem gert var.

Einnig leggur stjórnin til að ráðinn verði sérstakur stjórnandi yfir þjónustuna sem beri meðal annars ábyrgð á innleiðingu þeirra breytinga sem lagðar eru til í skýrslunni.

Fjallað er sérstaklega um mál Ólafar Þorbjargar Pétursdóttur sem gleymdist í margar klukkustundir í bíl ferðaþjónustunnar 4. febrúar. Þar segir að ljóst sé að margt hafi farið úrskeiðis í því tilviki. Bílstjórinn hafi ekki haft mikla reynslu af akstri með fatlað fólk og ekki gætt að því að tryggja að allir farþegar væru farnir úr bílnum.

Auk þess hafi verklag í Hinu húsinu brugðist en þar hafi verið nýir starfsmenn að störfum þar sem þeir sem eru reynslumeiri hafi verið fjarri vegna starfsdags. Einnig er gagnrýnt að forsvarsaðili akstursaðila hafi tjáð sig um málið á opinberum vettvangi og hafi ekki gætt „að þeirri trúnaðarskyldu sem hvílir á aðilum samkvæmt lögum og gildandi samningum“.

Ljóst er að sumar tillagna stjórnarinnar koma ekki til framkvæmda strax en telur Stefán að öryggi farþega ferðaþjónustunnar sé tryggt á meðan?

„Já, ég held að það hafi verið mjög margt gert til þess að laga brýnustu úrlausnarefnin sem snúa að öryggi þjónustunnar og þess vegna eru líkur á því að eitthvað alvarlegt gerist mun minni en áður. Það er auðvitað ekki hægt að útiloka það í þessu frekar en öðru en allt skipulagið og framkvæmdin miðast að því að ef menn fylgja öllum þeim reglum sem þarna gilda þá eigi ekki að vera frávik,“ segir Stefán.