Öruggt hjá Kristni og félögum

Columbus Crew vann öruggan 4-1 sigur á Philadelphia Union í MLS-deildinni í Bandaríkjunum í nótt.

Kristinn Steindórsson kom inn á sem varamaður í liði Columbus á 66. mínútu. Þá var staðan 3-1, Columbus í vil.

Kristinn hefur komið við sögu í öllum sjö leikjum liðsins á tímabilinu, tvisvar verið í byrjunarliðinu og fimm sinnum komið inn á sem varamaður.

Columbus leiddi með þremur mörkum gegn engu í hálfleik í leiknum í nótt. Kei Kamara, Ethan Finlay og Justin Meram skoruðu mörk Columbus sem er í 3. sæti Austurdeildarinnar með 11 stig.

Eric Ayuk Mbu minnkaði muninn fyrir Philadelphia á 64. mínútu en níu mínútum síðar gulltryggði Finlay sigur Columbus með sínu öðru marki. Lokatölur 4-1, Columbus í vil.

Næsti leikur Kristins og félaga er gegn D.C. United á útivelli 2. maí.