Schneiderlin með sigurmark Man Utd í sínum fyrsta leik fyrir félagið

Morgan Schneiderlin skoraði sigurmark Manchester United gegn Club America í sínum fyrsta leik fyrir félagið í nótt. Leikurinn fór fram í Seattle í Bandaríkjunum og er hluti af International Champions Cup.

Frakkinn gerði eina mark leiksins strax á 5. mínútu þegar hann skallaði fyrirgjöf Juans Mata í netið.

Allir fjórir leikmennirnir sem United hefur keypt í sumar komu við sögu í nótt. Auk Schneiderlins voru þeir Memphis Depay og Matteo Dermian í byrjunarliðinu en Bastian Schweinsteiger kom inn á sem varamaður í hálfleik.

David De Gea, sem hefur verið mikið í umræðunni á undanförnum mánuðum, lék ekki með United í nótt vegna minniháttar meiðsla að sögn Louis van Gaal, knattspyrnustjóra liðsins.