Ronaldo með tvö þegar Real Madrid fór á toppinn

Cristiano Ronaldo var í aðalhlutverki þegar Real Madrid tyllti sér á topp spænsku úrvalsdeildarinnar í fótbolta með 3-1 sigri á Real Sociedad á heimavelli í dag.

Ronaldo og félagar eru með 36 stig í toppsæti deildarinnar, einu stigi meira en Barcelona og Atletico Madrid. Börsungar eiga þó tvo leiki til góða og Atletico einn.

Ronaldo kom Real Madrid yfir með marki úr vítaspyrnu þremur mínútum fyrir hálfleik. Þetta var önnur vítaspyrnan sem Madrídingar fengu í leiknum en Ronaldo skaut yfir úr fyrra vítinu á 23. mínútu.

Baskarnir í Real Sociedad komu ákveðnir til leiks í seinni hálfleik og á 49. mínútu jafnaði Bruma metin með laglegu marki.

Ronaldo var aftur á ferðinni á 67. mínútu þegar hann kom Real Madrid í 2-1 með frábæru skoti eftir hornspyrnu Marcelo. Portúgalinn er nú kominn með 14 mörk á tímabilinu og er markahæstur í spænsku deildinni ásamt Neymar hjá Barcelona.

Það var svo varamaðurinn Lucas Vásquez sem gulltryggði sigur Real Madrid þegar hann skoraði þriðja mark liðsins fjórum mínútum fyrir leikslok eftir sendingu frá Gareth Bale. Lokatölur 3-1, Real Madrid í vil og liðið er komið á toppinn, allavega um stundarsakir.