48 látnir eftir að ferja og flutningaskip rákust saman

Ferja, með rúmlega hundrað farþega, og flutningaskip rákust saman á Padma ánni í Bangladess seinni partinn í dag. Minnst 48 drukknuðu og fjölda er saknað. Björgunarbátar og nærliggjandi skip tóku þátt í að bjarga fólki sem lenti í ánni. Atvikið átti sér stað um fjörutíu kílómetra frá höfuðborginni Dhaka. Álíka slys eru algeng í landinu en meira en 130 ár eru í landinu.

„Við vitum ekki hve margir voru um borð í ferjunni þegar slysið varð,“ segir Zihad Mia, yfirmaður björgunaraðgerða. Afar óalgengt er að fyrirtæki haldi bókhald um það hve margir farþegar eru um borð í skipum þeirra þar í landi.

Farþegi sem komst lífs af segir að flestir sem hafi verið á dekkinu hafi náð að koma sér í land en flestir þeir sem hafi verið neðan þilja hafi orðið innlyksa. Nefnd hefur verið skipuð til að rannsaka málið og á hún að skila af sér skýrslu innan fimmtán daga.

Þetta er ekki í fyrsta skipti sem mannskætt ferjuslys verður í Bangladess. Í ágúst í fyrra fórust rúmlega hundrað eftir að bátur með rúmlega tvöhundruð manns sökk á Padma ánni. Hann hafði aðeins leyfi til að flytja áttatíu farþega.